ROTa Porphyretica

ROTa Porphyretica

apud Petrum Diac. Chronici Casin. l. 4: c. 37. Cum in Rotam Porphyreticam venisset (Imperator Henricus) positis utrisque sedibus, consedêre. Alias Rota Romana: et simpliciter Rota, dicta est Camera Romae, cuius pavimentum ex marmore Porphyretico in Rotae figuram efformatum est; in qua agitantur publica iudicia, quorum Decisiones circumferutur. Seu Tribunal Romae est, ex XII. doctissimis Praelatis compositum, ad decidendas lites; Papae Capellani et Rotae Auditores appellantur. Sunt illi ex variis nationibus selecti. nimirum tres Romani, unus Germanus, unus Gallus, unus Castellanus, unus Aragonensis, unus Venetus, unus Mediolanensis Senensis et Perusinus per vices, Bononiensis item et Ferrariensis, qui in gradu Appellationis cognoscunt omnes lites beneficiales totius Orbis Romanam Religionem amplexi, ac causas civiles totius Ecclesiastici Senatus. Erexit hoc tribunal Ioannes XXII. Petrus And. Gammarus Rotae Auditor Scholis ad Extravag. Iulii II. Inter haec Rotam novis et saluberrimis statutis ornavit, quae hodie apud nos etiam servantur et quotannis initiô audientiarum publice leguntur; Et in summa ille primus administrationem iustitiae, cuius Vicecuncellarius caput est, quae in Regulis et Ordinationibus Rotae consistit, invenit etc. Vide supra, ubi de Regulis Cancellariae. Postea Clemens VIII. multis illud privilegiis cumulavit; Alexander porro VII. Auditoribus Rotae vestes et cingulum in pileo violacei coloris concessit, eosque Subdiaconos Apostolicos declaravit: qui proin Papâ sollenniter celebrante, canunt Epistolam, et in Capella Papali Clericos Camerales praecedunt; sed et Decanus eorum Cruciferi officium, in publicis functionibus, gerit etc. Vide Car. du Fresne in Glossar. inprimis vero Macros Fratres in Hierolex. ubi a Rota Romana, distinguentes Rotam Porphyreticam, hanc fuisse lapidem rotundum, in pavimento Lateranensis Basilicae positum, in quo Romanus Pontifex diversas functiones olim obierit, Ptolemaeo Lucensi etiam Roccam dictum, aiunt.